नांदेड न्यूज अपडेट: राज्यात आणखी दोन ते तीन दिवस रेमडेसिवीरचा तुटवडा; डॉ. राजेंद्र शिंगणे यांची माहिती

शनिवार, एप्रिल १७, २०२१

राज्यात आणखी दोन ते तीन दिवस रेमडेसिवीरचा तुटवडा; डॉ. राजेंद्र शिंगणे यांची माहिती

मुंबई,दि 17 एप्रिल : राज्यात कंपन्यांकडून मागविण्यात आलेल्या रेमडेसिवीरच्या साठय़ापैकी 12 ते 15 हजार रेमडिसीवीरचा कमी पुरवठा झाला आहे. यामुळे पुढील 2 ते 3 दिवस रेमडेसिवीर इंजेक्शनचा तुटवडा जाणवण्याची शक्यता आहे, अशी माहिती उत्पादकांसोबत पार पडलेल्या बैठकीनंतर अन्न व औषध प्रशासनमंत्री डॉ. राजेंद्र शिंगणे यांनी पत्रकार परिषदेत बोलताना दिली.

राजेंद्र शिंगणे म्हणाले, नुकतीच माझी काही कंपन्यांच्या एमडी व सीईओंसोबत व्हिडीओ कॉन्फरन्सिंगद्वारे चर्चा झाली. भविष्यात रेमडेसिवीरचा पुरवठा कशा प्रकारे त्या कंपन्यांच्या माध्यमातून ते वाढवून देतील? किती वाढवला जाणार आहे? याबाबत विचारणा करण्यात आली. कारण साधरण तीन आठवडय़ांपूर्वी याच कंपन्यांच्या सीईओ व एमडींसोबत मी बैठक घेतली होती त्यावेळेस मला त्यांनी पुढील 15 तारखेपर्यंतचा कार्यक्रम दिला होता. त्या कार्यक्रमानुसार दररोज ते महाराष्ट्रात 55 हजार रेमडेसिवीर पुरवतील अशी ग्वाही त्यांनी दिली होती; परंतु कालच्या तारखेपर्यंत सरासरी जर आपण पाहिली तर 37 ते 39 हजारपर्यंतच त्यांनी रेमडेसिवीर पुरवले आहे, असेही डॉ. शिंगणे यांनी सांगितले.

20 एप्रिलपर्यंत पुरवठा सुरळीत होईल

दररोज रुग्णांची संख्या वाढत असताना रेमडेसिवीरची मागणीही वाढणार आहे. याबाबत या उत्पादकांसोबत चर्चा झाली असून 19-20 एप्रिलनंतर हा पुरवठा सुरळीत होईल, असे आश्वासन कंपन्यांकडून देण्यात आले आहे, असे राजेंद्र शिंगणे म्हणाले. याचबरोबर ‘केंद्र शासनाने अतिशय चांगला व महत्त्वपूर्ण निर्णय तीन-चार दिवसांअगोदर घेतला. रेमडेसिवीरची निर्यात बंदी त्यांनी केली हे खूप चांगले काम झाले आहे. यामुळे निर्यातीसाठी तयार असलेला रेमडेसिवीरचा मोठा साठा देशभरातील व काही महाराष्ट्रातील कंपन्यांकडे उपलब्ध असल्याची माहिती मिळाली आहे. यासंदर्भात या कंपन्यांना त्यांचा माल इथे विकण्यासाठी परवानगी देण्याबाबत आम्ही कालच बैठक घेतली आहे. आता त्या कंपन्यांशी संपर्क साधण्याचे काम आमच्या विभागाकडून सुरू आहे, असेही शिंगणे म्हणाले.