शनिपेठ पोलीस ठाण्याच्या लाचखोर नाईकाच्या एसीबीने आवळल्या मुसक्या; १ लाखाची लाच घेताना रंगेहाथ अटक!

 

संजय पाटील चिखले

जळगाव,१३/०४/२०२६: जळगाव पोलीस खात्याची प्रतिमा मलीन करणाऱ्या एका भ्रष्ट कारभाराचा आणखी एक नमुना समोर आला असून, एका तक्रारी अर्जात सवलत देण्यासाठी चक्क २ लाखांची लाच मागणाऱ्या पोलीस नाईकाचा लाचलुचपत प्रतिबंधक विभागाने (ACB) 'करेक्ट कार्यक्रम' केला आहे. शनिपेठ पोलीस ठाण्यात कार्यरत असलेला पोलीस नाईक विनोद पितांबर अहिरे याला १ लाख रुपयांची लाच स्वीकारताना रंगेहाथ अटक करण्यात आली असून, त्याच्याविरुद्ध गुन्हा दाखल करण्यात आला आहे.

​नेमकी घटना आणि तक्रार:

​मिळालेल्या माहितीनुसार, या प्रकरणातील मूळ तक्रारदार हे जळगाव शहरातील रहिवासी आहेत. त्यांच्या मुलाविरुद्ध शनिपेठ पोलीस स्टेशन येथे एक तक्रारी अर्ज प्राप्त झाला होता. या अर्जाची चौकशी आरोपी लोकसेवक पोलीस नाईक विनोद पितांबर अहिरे (बक्कल नं. ४०) याच्याकडे सोपवण्यात आली होती.

​या अर्जात तक्रारदाराच्या मुलावर कोणतीही कायदेशीर कारवाई न करण्यासाठी आणि सदर अर्ज निकाली काढून (निर्गती) देण्यासाठी अहिरे याने २,००,००० (दोन लाख) रुपयांच्या लाचेची मागणी केली. लाच देण्याची इच्छा नसल्याने तक्रारदाराने १३ एप्रिल २०२६ रोजी एसीबी जळगाव युनिटकडे धाव घेऊन तक्रार नोंदवली.

​एसीबीचा सापळा आणि कारवाई:

​तक्रार प्राप्त होताच एसीबीने लाचेच्या मागणीची पडताळणी केली. तडजोडीअंती १,००,००० (एक लाख) रुपये देण्याचे निश्चित झाले. त्यानुसार, आज सोमवार, दिनांक १३ एप्रिल २०२६ रोजी सायंकाळी ४:०० वाजेच्या सुमारास जळगाव शहरातील बिल्डिंग नं. ए-४, रूम नं. ४०, पोलीस लाईन या परिसरात सापळा रचण्यात आला.

​पोलीस नाईक विनोद अहिरे याने तक्रारदाराकडून लाचेची १ लाख रुपयांची रक्कम पंचांसमक्ष स्वतः स्वीकारली. त्याच क्षणी दबा धरून बसलेल्या एसीबीच्या पथकाने त्याला झडप घालून ताब्यात घेतले. या कारवाईनंतर जळगाव पोलीस दलात मोठी खळबळ उडाली आहे.

​एफआयआर (FIR) मधील तांत्रिक तपशील:

​एसीबीच्या कारवाईनंतर शनिपेठ पोलीस स्टेशन येथे रात्री उशिरा गुन्हा नोंदवण्यात आला आहे:

• ​FIR नंबर: ००७९/२०२६
• ​नोंदणी वेळ: १३/०४/२०२६, रात्री २३:०१ वा.
• ​कलम: भ्रष्टाचार प्रतिबंधक अधिनियम, १९८८ चे कलम ७ प्रमाणे.
• ​घटनास्थळ: जळगाव शहरातील शनिपेठ पोलीस ठाण्यापासून उत्तर दिशेला ०.५ किमी अंतरावर.

​कोणी केली कारवाई?

​ही यशस्वी कारवाई लाचलुचपत प्रतिबंधक विभाग, जळगाव युनिट चे पोलीस उप अधीक्षक श्री. योगेश ठाकूर यांच्या  पर्यवेक्षणाखाली करण्यात आली.

• ​पर्यवेक्षण अधिकारी: श्री. योगेश ठाकूर (पोलीस उप अधीक्षक, एसीबी जळगाव).
• ​सापळा अधिकारी: श्री. हेमंत नागरे (पोलीस निरीक्षक).
• सापळा पथक: पोलीस उपनिरीक्षक सुरेश पाटील, मपोहेकॉ संगीता पवार, पोकॉ राकेश दुसाने, सचिन चाटे आणि अमोल सूर्यवंशी.

• तपास अधिकारी: सौ. स्मिता नवघरे (पोलीस निरीक्षक).

​एसीबीने नागरिकांना आवाहन केले आहे की, कोणत्याही लोकसेवकाने कामासाठी लाचेची मागणी केल्यास त्वरित टोल फ्री क्रमांक १०६४ किंवा ०२५७-२२३५४७७ या क्रमांकावर संपर्क साधावा.

संपर्क पत्ता:- ला.प्र.वि. कार्यालय, जिल्हाधिकारी कार्यालय आवार, जळगाव

विभागाचे अधिकृत संकेतस्थळ:- acb.maharastra.gov.in

मेल आयडी- dyspacbjalgaon@gmail.com

छत्रपती संभाजीनगर जिल्ह्यात १७६९ रुग्णांना सुमारे १४.२५ कोटींची मदत; मुख्यमंत्री देवेंद्र फडणवीस यांच्या दूरदृष्टीतून आरोग्यसेवेला गती

मुख्यमंत्री सहाय्यता निधी व धर्मादाय रुग्णालय मदत कक्ष

बातमीचे अंतरंग (Highlights):

• २० गंभीर आजारांसाठी मदत
• सामंजस्य करारातून मदतीचा मार्ग मोकळा
• आर्थिक वर्षातील मदत

 संजय चिखले पाटील

छत्रपती संभाजीनगर | १० एप्रिल २०२६

          शासनाच्या आरोग्यविषयक विविध योजनांमधून मदत न मिळालेल्या पात्र व गरजू रुग्णांसाठी मुख्यमंत्री सहाय्यता निधी ‘आधार’ ठरत आहे. छत्रपती संभाजीनगर जिल्ह्यात आर्थिक वर्षात १७६९ रुग्णांना सुमारे १४ कोटी २५ लाख रुपयांची वैद्यकीय आर्थिक मदत वितरित करण्यात आली आहे.

      मुख्यमंत्री देवेंद्र फडणवीस यांच्या दूरदृष्टीतून जिल्हा कक्षाची स्थापना, पेपरलेस अर्ज प्रक्रिया, अर्जांचा तातडीने निपटारा आदी सकारात्मक बदल करण्यात आले आहेत. त्यासोबतच सामंजस्य करार, क्राउडफंडिंग आदी माध्यमांतून समाजातील मदत करणारी रुग्णालये, धर्मादाय रुग्णालये, संस्था व दाते यांचे सहकार्य लाभत आहे. मुख्यमंत्री सहाय्यता निधीच्या कार्यपद्धतीत केलेल्या सुधारणांमुळे आणि मदतीचे विविध मार्ग उपलब्ध करून दिल्यामुळ पारदर्शकता वाढून मदत वितरणाचा वेग लक्षणीयरीत्या वाढला आहे. परिणामी, अधिकाधिक पात्र रुग्णांना वेळेत आर्थिक सहाय्य मिळत आहे.

२० गंभीर आजारांसाठी मदत

        कॉक्लियर इम्प्लांट (वय वर्षे २ ते ६), हृदय, यकृत, किडनी, फुफ्फुस, बोन मॅरो, हात व गुडघ्यांचे प्रत्यारोपण, हिप रिप्लेसमेंट, कर्करोग शस्त्रक्रिया, रस्ते अपघात, लहान बालकांची शस्त्रक्रिया, मेंदूचे आजार, हृदयरोग, डायालिसिस, कर्करोग (केमोथेरपी/रेडिएशन), अस्थिबंधन, नवजात शिशूंचे आजार, भाजलेले (बर्न) रुग्ण, विद्युत अपघातातील रुग्ण अशा एकूण २० गंभीर आजारांसाठी अर्थसाहाय्य दिले जाते.

सामंजस्य करारातून मदतीचा मार्ग मोकळा

        मुख्यमंत्री देवेंद्र फडणवीस यांच्या पुढाकाराने मुख्यमंत्री सहाय्यता निधी कक्ष, बीपीसीएल फाउंडेशन व टाटा मेमोरियल सेंटर यांच्यात बालकांच्या कर्करोग उपचारासाठी नुकताच सामंजस्य करार करण्यात आला आहे. या करारामुळे सामाजिक दायित्व (CSR) अंतर्गत उपचारांसाठी विशेष निधी उपलब्ध होणार आहे. आर्थिक अडचणी कमी होऊन गरजू बालकांना गुणवत्तापूर्ण कर्करोग उपचार सुलभ होणार आहेत.

आर्थिक वर्षातील मदत

          १ एप्रिल २०२५ ते ३१ मार्च २०२६ या कालावधीत राज्यातील तब्बल ४० हजार ७७६ रुग्णांना ३३३ कोटी ६ लाख ८१ हजार ५०० रुपयांची वैद्यकीय मदत देण्यात आली आहे. तर, याच कालावधीत छत्रपती संभाजीनगर जिल्ह्यातील १७६९ रुग्णांना सुमारे १४ कोटी २५ लाख ०२ हजार ५०० रुपयांची आर्थिक मदत वितरित करण्यात आली आहे.

          मुख्यमंत्री देवेंद्र फडणवीस यांच्या संकल्पनेतून सुरू करण्यात आलेल्या जिल्हा कक्ष, पेपरलेस अर्ज प्रक्रिया व सामंजस्य करार यांमुळे रुग्णांना वेळेत अर्थसाहाय्य मिळत आहे. गरजू रुग्णांनी योजनेचा लाभ घेण्यासाठी व अधिक माहितीसाठी १८०० १२३ २२११ या टोल-फ्री क्रमांकावर संपर्क साधावा, असे आवाहन मुख्यमंत्री सहाय्यता निधी व धर्मादाय रुग्णालय मदत कक्षाचे कक्ष प्रमुख रामेश्वर नाईक यांनी केले आहे.

००००

TAGS आरोग्य मुख्यमंत्री सहाय्यता निधी मुख्यमंत्री देवेंद्र फडणवीस Chhatrapati Sambhaji Nagar, CM Relief Fund, Health News, Devendra Fadnavis