शैक्षणिक वर्ष २०२१-२०२२ ची सुरुवात दिनांक १५ जून २०२१ पासून ! मात्र विद्यार्थ्यांच्या उपस्थितीचा प्रश्न जैसे थे

• शाळेत विद्यार्थ्यांना बोलवण्या संदर्भात अद्याप सूचना नाहीत.
• आस्थापना वरील १००% कर्मचारी उपस्थित राहणार आहेत.
• सर्व प्राथमिक व माध्यमिक शिक्षकांना शाळेत उपस्थित राहण्याच्या सूचना.

नांदेड, दि १२ जून २०२१ : नांदेड जिल्ह्यातील प्राथमिक आणि माध्यमिक शाळांच्या शैक्षणिक वर्ष २०२१-२०२२ ची सुरुवात दिनांक १५ जून पासून करण्यात येत आहे,तसे जिल्ह्यातील सर्व तालुक्यातील पंचायत समितीच्या गट शिक्षणाधिकाऱ्यांना ११ जून रोजी प्राथमिक व माध्यमिक शिक्षणाधिकारी यांच्या संयुक्त स्वाक्षरीचे पत्र पाठवण्यात आले आहे.

शिक्षण संचालक यांच्या ३० एप्रिल २०२१ रोजीच्या पत्रानुसार शैक्षणिक वर्ष २०२१-२२ या सत्राची दिर्घ सुट्टी संपल्यानंतर जिल्ह्यातील सर्व व्यवस्थापन,सर्व माध्यम व सर्व प्रकारच्या शाळा दिनांक १५.०६.२०२१ मंगळवार पासून सुरु होत आहेत.त्यानुसार आपल्या कार्यक्षेत्रातील सर्व शाळांना कळवावे अशा सूचना शिक्षण संचालक यांनी जिल्हापरिषदेच्या प्राथमिक व माध्यमिक शिक्षणाधिका-यांना दिल्या होत्या.

तसेच जिल्हा आपत्ती व्यवस्थापन प्रमुख तथा जिल्हाधिकारी नांदेड यांनी ६ जून २०२१ नुसार शाळेत विद्यार्थ्यांना बोलवणे संदर्भात अद्याप कोणत्याही सूचना नाहीत परंतु सर्व आस्थापनावरील १००% कर्मचारी उपस्थितीसह शाळा सुरु राहतील अशा सूचना असल्याने सर्व शिक्षकांना उपस्थित राहावे लागणार आहे.

१५ जून पासून सर्व शिक्षक शाळेत उपस्थित राहून विद्यार्थ्यांचे प्रवेश, शैक्षणिक नियोजन, ऑनलाईन शिक्षण, वृक्षारोपण इत्यादी उपक्रम राबविण्यास सुरुवात करावी.कोरोना संदर्भातील मास्क, सॅनिटायझर, सामाजिक अंतर राखणे,हॅंडवॉश सुविधा यांची आवश्यक ती दक्षता घ्यावी व दिनांक १५ जून २०२१ रोजी सर्व शाळा सुरु झाल्याबाबत आणि शिक्षक उपस्थिती बाबतचा अहवाल तात्काळ सादर करण्याच्या सूचना ही देण्यात आली आहे.

शैक्षणिक वर्ष २०२१-२२ ची सुरुवात करण्याबाबत जिल्ह्यातील सर्व गटशिक्षणाधिका-यांना पत्राद्वारे सूचना दिल्याची माहितीही वरिष्ठांना म्हणजे जिल्हाधिकारी,मुख्यकार्यकारी अधिकारी तसेच शिक्षण उपसंचालक लातूर यांना प्राथमिक व माध्यमिक शिक्षणाधिकारी यांच्याकडून देण्यात आली आहे.