लाच देणे आणि लाच घेणे दोन्ही कायद्याने गुन्हा आहे
उस्मानाबाद,दि 18 मे 2021 : उस्मानाबाद तालुक्यातील मेंढा ग्रामपंचायत ची महिला सरपंच व पतीने एका युवकाकडे ५ हजार रुपयांची लाच मागितली होती. मात्र सापळ्याचा संशय आल्याने सरपंचपतीने पैसे न स्वीकारताच पळ काढला.
तक्रारदार युवकाची उस्मानाबाद तालुक्यातील मेंढा गावच्या शिवारात शेती आहे. यापैकी एका एकरात या तरुणाने शासनाच्या फळबाग योजनेतून शेवग्याचे पीक घेतले आहे. या पिकाच्या मशागतीकरिता संबंधित तरुण हा मस्टर मागणीवर स्वाक्षरी घेण्यासाठी १० मे रोजी सरपंच शशिकला विश्वनाथ कांबळे हिच्याकडे गेला होता. घरामध्ये तेव्हा सरपंचपती विश्वनाथ कांबळे हाही हजर होता.मस्टर मागणीवर स्वाक्षरी करण्याची विनंती केली असता, सरपंच महिलेने पूर्वीच्या ५ मस्टरचे प्रत्येकी १ हजार रुपये याप्रमाणे एकूण ५ हजार रुपये देण्याची मागणी केली. ही रक्कम विश्वनाथ कांबळे याच्याकडे दिल्यानंतरच मस्टर मागणीवर स्वाक्षरी करू,असे सांगितले. त्यामुळे तरुणाने लाचलुचपत प्रतिबंधक विभागाकडे याबाबत तक्रार केली. त्यानंतर पोलिसांनी मंगळवारी सापळा रचला. ठरल्याप्रमाणे तक्रारदार तरुण लाचेची रक्कम घेऊन सरपंचपती विश्वनाथ कांबळे याच्याकडे गेला. मात्र विश्वनाथ कांबळे याला संशय आल्याने त्याने रक्कम न स्वीकारताच तेथून काढता पाय घेतला.
याप्रकरणी मंगळवारी मध्यरात्री बेंबळी ठाण्यात लाचखोर महिला सरपंच व तिच्या पती विरुद्ध लाचलुचपत प्रतिबंधक कायद्यानुसार गुन्हा दाखल करण्यात आला आहे.
कोणत्याही टिप्पण्या नाहीत:
टिप्पणी पोस्ट करा
बातमी विषयी आपण आपली टिप्पणी,अभिप्राय नोदवू शकता किंवा काही सूचना मांडू शकता